Bashkimi i Sindikatave të Pavarura të Kosovës (BSPK) ka mbështetur fuqishëm reagimin e sotëm të Këshillit Drejtues të Sindikatës së Policisë së Kosovës.
Lexo më shumë: IPK-ja rekomandon suspendimin e një togeri policor, dyshohet për fotografim të paautorizuar
“Distancimi i Këshillit Drejtues të Sindikatës së Policisë së Kosovës nga veprimet e kundërligjshme të Kryetarit të Sindikatës së Policisë së Kosovës, z. Imer Zeqiri, për çka edhe është suspenduar me rekomandim të Inspektoratit Policor të Kosovës me dyshimin se ka kryer veprën penale fotografim dhe incizime të tjera të paautorizuara nga neni 202 i KPRK-së, është i duhuri”, thuhet në reagimin e BSPK-së.
Në këtë reagim thuhet se BSPK-ja e përkrahë fuqishëm reagimin e Këshillit Drejtues të Sindikatës së Policisë së Kosovës, pasi që veprimet e kryetarit të Sindikatës së Policisë së Kosovës, Imer Zeqiri, janë “kundërligjore”.
“Të përgjuarit e Nënkryetarëve të SPK-së dhe njëherësh Nënkryetares së BSPK-së nga z. Imer Imeri, flasin shumë dhe tregojnë shumë se organizimet e mirëfillta sindikale u pengojnë njerëzve jo parimorë të cilët duan të shkatërrojnë organizimin e mirëfilltë sindikal qoftë me përgjime të kundërligjshme ndaj Nënkryetarëve të SPK-së gjegjësisht Nënkryetares së BSPK-së, qoftë edhe me shpifje ndaj Kryetarit të BSPK-së, siç ishin ato të fundit ku ishte i pranishëm edhe vetë z. Imer Zeqiri”, thuhet tutje në këtë reagim.
Më tej thuhet se BSPK-ja qëndron fuqishëm krah Sindikatës së Policisë së Kosovës në të gjitha veprimet, siç ata i kanë vlerësuar si të “mirëfillta dhe të duhura” në drejtim të përmirësimit të kushteve të punës së punonjësve të Policisë së Kosovës.