Ministri i Punëve të Brendshme, Xhelal Sveçla, në llogarinë e tij në Facebook ka publikuar pamjet e një veture që u gjet me një sasi eksplozivi në Komunën e Leposaviqit.
Kështu, Sveçla e ka akuzuar shtetin serb për terrorizim duke thënë se kur humbet betejat politike Serbia kthehet te retorika luftënxitëse dhe terrorizimi.
“Kur Serbia humbet betejat politike, në mungesë argumentesh kthehet te retorika luftnxitëse dhe aktet e dhunës deri në terrorizëm. Tendenca për kontrollin e pjesëtarëve të komunitetit serb në Kosovë vazhdon, por çdo ditë me më pak sukses. Zërat kundërshtarë në radhët e komunitetit po shtohen çdo ditë, për të çliruar qytetarët nga gangsterët dhe kuazi politikanët pro Serbi”, ka shkruar Sveçla në Facebook.
Më tej Sveçla ka thënë se veprimeve kriminale në veri iu ka kaluar koha.
“Kërcënimeve, djegies së pronave, vendosjes së eksplozivit dhe rrezikimit të jetës por dhe shtypjes së atyre që mendojnë drejtë e ndryshe, i ka kaluar koha. Tani, shteti ligjor është shtrirë në të gjithë territorin e Republikës sonë. Siguri, drejtësi dhe mirëqenie për të gjithë pa dallim dhe llogaridhënie për shkelësit e ligjit”, ka shtuar ministri Sveçla.
Për rastin e lartcekur ka raportuar edhe Policia e Kosovës, të cilët kanë thënë se gjatë mëngjesit të së martës janë njoftuar se nën një veturë në Leposaviq gjendet një mjet i dyshimtë i pashpërthyer.
Këtë e ka konfirmuar zëvendësdrejtori i policisë për rajonin e veriut, Veton Elshani, i cili tha se me të marrë informacionin, në vend të ngjarjes kanë dalë njësitet përkatëse të policisë.
“Sot rreth orës 11.00, policia ka pranuar informacion se nën një veturë në qytetin e Leposaviqit gjendet një mjet i dyshimtë i pashpërthyer. Policia ka reaguar menjëherë dhe në vendin e ngjarjes janë përgjigjur njësitet relevante policore, duke përfshirë edhe Njësinë K9 dhe EOD të Policisë. Prezent ishin edhe EOD e KFORI-it Amerikan”, ka thënë Elshani.
Ai ka thënë se mjeti i pashpërthyer është tërhequr nga vendi në mënyrë të sigurt.