“Veturat në pjesën veriore të Kosovës do të regjistrohen vetëm me targa RKS si në të gjithë Republikën”, ka thënë Ministri i Punëve të Brendshme, Xhelal Sveçla.
Ministri Sveçla ka folur për vendimin e ndryshimit të targave nga ‘KM’ në ‘RKS’, ku ka thënë se më datën një shtator në ora 8 të mengjesit fillon afati për ndryshimin e targave i cili do të zgjatë deri më një nëntor.
“Shtetasit e Kosovës mund t’i ndërrojnë targat nga ilegale në legale me disa lëshime apo privilegje të njëhershme që shteti i Kosovës iu ka ofruar e cila do të zgjat për dy muaj”, ka thënë Sveçla në RTK.
Më tej ai ka shtuar se ka sinjale të mira sepse kanë pranuar shumë pyetje si bëhet kjo procedurë.
“Është e kuptueshme se prej kësaj Serbie, ne nuk presimi kurgja të mirë e cila udhëhiqet nga presidenti Alksandar Vuçiq, i cili ka qenë ministër i propagandës në kohën e ish-presidentit të Serbisë [Jugosllavisë] të Milloshoviqit”.
Sipas Sveçlës, qytetarët në pjesën veriore të Republikës së Kosovës nuk duhet ta humbin këtë mundësi dhe ”pse ka presion nga Serbia që kjo iniciative të dështojë”.
Ai ka përfunduar duke thënë se vetëm në rajonet ekzistues mund të regjistrohen veturat dhe nuk do të krijohet rajon i ri dhe gjithashtu ai ka thirrur qytetarët që ta shfrytëzojnë këtë mundësi sepse kjo iu mundëson të kursejnë rreth 5 mijë euro.