Kryetari i Aleancës për Ardhmërinë e Kosovës (AAK), Ramush Haradinaj, do të zhvillojë takim me këshilltarin e lartë të Departamentit të Shteteve te Bashkuara të Amerikës, Derek Chollet.
Këtë e ka konfirmuar shefi i Grupit Parlamentar të Aleancës për Ardhmërinë e Kosovës, Besnik Tahiri, në një konferencë për media, ku ka theksuar se Haradinaj do të ketë takim edhe me emisarin e SHBA-së për Ballkanin Perëndimor, Gabriel Escobar, dhe përfaqësuesin Special të BE-së për Dialogun Beograd-Prishtinë, Miroslav Lajçak, kur të njëjtit do ta vizitojnë Kosovën.
Sipas Tahirit, roli amerikan në çështjen e dialogut Kosovë-Serbi është jetik.
“Besoj që do të ketë kryetari një takim me këshilltarin e lartë, Chollet. Ne vazhdojmë të qëndrojmë fuqishëm në qëndrimin tonë se arritja e një marrëveshjeje ligjërisht e obligueshme mes Kosovës dhe Serbisë është momentumi më i duhur dhe duhet të ndodhë njëkohësisht roli amerikan edhe i këshilltarit Chollet dhe Escobar është jetik. Lidershipi amerikan në arritjen e kësaj marrëveshjeje është jashtëzakonisht i rëndësishëm dhe duhet të ndodhë. Kosova duhet të jetë unike karshi ballafaqimit mes Serbisë dhe arritjes sa më shpejt të marrëveshjes”, ka thënë Tahiri.
Në anën tjetër, deputeti i kësaj partie, Shemsedin Dreshaj, ka folur lidhur me skemën pensionale dhe padrejtësitë që po u bëhen pensionistëve.
Ai ka thënë se është e pandershme që të punosh 14 vjet e 11 muaj para vitit 1999, dhe të llogaritet sikurse nuk ke dhënë kontribut fare.
“Ftesa e sotme është bërë që t’ju informojmë në lidhje me vendimin e Gjykatës Kushtetuese që ka vendosur që të largohet neni 8, paragrafi 2 i Ligjit L4 131 për skemat pensionale dhe njëkohësisht që nga udhëzimi administrativ ku në mënyrë diskriminuese të gjitha gradimet që janë bërë gjatë viteve të 90-ta deri më sot ato nuk janë marrë në konsideratë”.
Sipas tij, kërkesa e AAK-së është që të largohet ky kushtëzim, i dëmshëm dhe diskriminues për punëtorët e viteve të 90-ta.
“Tash kur Kushtetuesja foli, jemi në proces të modifikimit të ndërrimit dhe plotësimit të këtij ligji, secili qytetar do të shpërblehet me pension për aq vite sa ka punuar e jo siç ka qenë deri më tash. Kërkesa jonë është që të largohet ky kushtëzim”, shtoi Dreshaj.
Po ashtu, të dy deputetët në fund theksuan se AAK e mbështet Ligjin për tërheqjen e mjeteve nga TRUSTI pensional.
Dreshaj ka thënë se janë pro, kur u pyet se a do ta përkrahin ligjin për skemat pensionale dhe tërheqjen e mjeteve monetare nga fondi pensional.