Komuna e Skenderajt ka njoftuar se ceremonia e varrimit Të Hashi Thaçit, babait të ish-presidentit Hashim Thaçi, do të mbahet nën përkujdesjen e kryetarit të Komunës së Skenderajt, Fadil Nura, ndërsa janë përcaktuar aktivitetet zyrtare për nderimin e tij.
Sipas njoftimit të komunës, homazhet pranë arkivolit të të ndjerit do të mbahen të martën më 18 mars, nga ora 09:00 deri në 12:00, në palestrën “Ilaz Kodra” në Skenderaj.
Pas homazheve, në të njëjtin vend, duke filluar nga ora 12:00, do të zhvillohet mbledhja komemorative.
Varrimi i Haxhi Thaçit do të bëhet po të njëjtën ditë, në orën 15:00, në varrezat e reja të fshatit Burojë, vendlindja e familjes Thaçi.
Ndërsa e pamja për të ndjerin do të organizohet më 19 dhe 20 mars 2025, në palestrën “Ilaz Kodra” në Skenderaj.
Komuna e Skenderajt, në emër të qytetarëve të saj, ka shprehur ngushëllimet më të sinqerta për familjen Thaçi dhe të gjithë ata që kanë njohur dhe vlerësuar jetën dhe veprën e Haxhi Thaçit.