Ministri polak i Punëve të Jashtme, Zbigniew Rau, pritet të takohet me presidenten e Kosovës, Vjosa Osmani, të premten e 15 korrikut.
Kryesuesi i radhës i OSBE-së njëherësh, ministër i Punëve të Jashtme në Poloni, Zbigniew Rau, ka arritur të enjten në Kosovë. Qëllim i kësaj vizite është diskutimi rreth angazhimit politik të Polonisë në rolin e saj si kryesuese e radhës në OSBE.
Përveç takimit me presidenten Osmani, Ministri Rau do të takohet edhe me kryetarin e Kuvendit, Glauk Konjufca, zëvendëskryeministren dhe ministren e Punëve të Jashtme, Donika Gërvalla-Schwarz, si dhe me ministrin për Komunitete dhe Kthim, Goran Rakiq.
Në mesin e takimeve të tij bëjnë pjesë edhe takimet me udhëheqësit e Misionit të OSBE-së në Kosovë dhe me Grupin e Trajnuesve, grup ekspertësh të të drejtave të njeriut i themeluar nga OSBE.
Para se të përmbyllë vizitën e tij me një konferencë për media, e cila është planifikuar të mbahet prej orës 16:30 në ambientet e institucionit të Avokatit të Popullit, ai do të vizitojë Komisionin Qendror të Zgjedhjeve (KQZ), komision i mbështetetur nga OSBE dhe Polonia.