Rada Trajkoviq, këshilltarja e ministrit për Kthim dhe Komunitete, Nenad Rashiq, ka thënë se presidenti i Serbisë, Aleksandër Vuçiq, ka nisur ta humbasë kontrollin e plotë mbi serbët e Kosovës.
Ajo ka thënë se angazhimi i saj si këshilltare e ministrit Rashiq, ka për qëllim që të kuptojë se çfarë diskutohet në dialogun midis dy vendeve.
“Vetë përfshirja jonë në Qeverinë e Kurtit ka për qëllim që të kuptojë se çfarë po diskutohet, duke marrë parasysh se është temë tërësisht e mbyllur, jo vetëm për publikun e Serbisë, por edhe për ata që preken direkt nga kjo, përkatësisht serbët në Kosovë. Lista Serbe ishte e kënaqur me atë që presidenti thotë dhe atë që presidenti e di”, ka thënë Trajkoviq.
Ajo ka theksuar se me ardhjen e saj dhe të Rashiqit, Lista Serbe nuk do ta ketë pushtetin absolut që ka pasur te serbët.
“Lista Serbe implementon gjithçka që Vuçiqi thotë. Një pjesë e pushtetit të Vuçiqit në Kosovë ka ndryshuar pjesërisht me emërimin tonë. Ai s’do të jetë në gjendje të marrë vendime pa na treguar ndokush diçka”, ka thënë Trajkoviq për “N1”.
Sipas Trajkoviqit, tashmë ka nisur edhe “zgjimi i serbëve në Kosovë”.
Ajo ka folur edhe për propozimin franko-gjerman, duke shtuar se i njëjti “është pranuar në një masë, me disa ndryshime”.
Sa i përket zgjedhjeve të jashtëzakonshme lokale në veri të Kosovës, Trajkoviq ka thënë se do të ishte e turpshme të mbahen zgjedhjet në veri të Kosovës nëse nuk ka asnjë kandidat serb.