Kampionia në fuqi, KB Trepça, ka marrë epërsinë 1:0 në serinë gjysmëfinale të plejofit të basketbollit kosovar, pasi mposhti KB Peja me rezultat 86:78.
Skuadra mitrovicase e justifikoi epitetin e favorites, ndonëse u përball me vështirësi në disa faza të ndeshjes. Megjithatë, në minutat vendimtare arriti të shkëputet dhe të sigurojë fitoren.
Trepça dominoi në pjesën e parë, duke fituar dy çerekët e parë 24:21 dhe 24:16, për të shkuar në pushim me epërsi prej 11 pikësh. Në periudhën e tretë, Peja reagoi dhe e ngushtoi diferencën, duke e fituar këtë çerek 17:13.
Dueli u bë edhe më dramatik në çerekun e fundit, kur mysafirët u afruan në vetëm tri pikë diferencë (65:62 dhe 78:75), dy minuta para përfundimit të takimit.
Megjithatë, në momentet kyçe, vendasit e udhëhequr nga trajneri Adis Beqiragić treguan më shumë qetësi, duke realizuar disa aksione të suksesshme, ndërsa gabimet e Pejës ndikuan që fitorja të mbetet në Mitrovicë.