Skuadra mitrovicase Trepça siguroi finalen të dielën mbrëma, pasi mposhti Pejën me rezultat 103:96 në palestrën “Karagaçi”, duke e fituar serinë gjysmëfinale me shifrat 3:1.
Ndeshja nisi më mirë për vendasit, që fituan çerekun e parë 32:24.
Megjithatë, Trepça reagoi fuqishëm në periudhën e dytë, duke e dominuar atë me rezultat të thellë 34:14 dhe duke shkuar në pushim me epërsi 58:46.
Në çerekun e tretë, Peja ishte paksa më e mirë (23:22), por Trepça ruajti kontrollin e lojës, duke hyrë në dhjetëminutëshin e fundit me avantazh 80:69.
Peja nuk u dorëzua dhe në minutat e fundit e ngushtoi diferencën në vetëm një pikë (92:91), 1 minutë e 25 sekonda para fundit.
Megjithatë, Dardan Kapiti realizoi dy gjuajtje të lira për 94:91, ndërsa më pas Sek Henry shënoi një treshe vendimtare 32 sekonda para fundit për 97:91, duke vulosur fitoren e Trepçës.
Skuadra mitrovicase tani pret kundërshtarin në finale, që do të dalë nga përballja gjysmëfinale mes Bashkimit dhe Borës, ku rezultati aktual është 2:2. Ndeshja vendimtare zhvillohet të mërkurën në Prizren.