Presidenti i Shteteve të Bashkuara, Donald Trump, ka deklaruar se po e shqyrton seriozisht mundësinë e largimit të SHBA-së nga NATO, duke e kritikuar aleancën për mungesë mbështetjeje gjatë luftës me Iranin.
Në një intervistë për “The Telegraph”, Trump e cilësoi NATO-n si një “tigër prej letre”, duke shtuar se largimi i SHBA-së nga traktati i mbrojtjes është tashmë “përtej rishqyrtimit”.
Këto deklarata konsiderohen si sinjali më i fortë deri më tani se Shtëpia e Bardhë po e sheh Evropën gjithnjë e më pak si një partnere të besueshme, pas refuzimit të aleatëve për të kontribuar në rihapjen e Ngushticës së Hormuzit, një rrugë kyçe për tregtinë globale të naftës.
Trump theksoi se nuk ka qenë kurrë i bindur nga roli i NATO-s, duke shtuar se edhe presidenti rus, Vladimir Putin, e percepton aleancën në të njëjtën mënyrë. Ai kritikoi gjithashtu aleatët për mungesë angazhimi, duke thënë se SHBA ka qenë gjithmonë e gatshme të ndihmojë, përfshirë në rastin e Ukrainës, ndërsa, sipas tij, partnerët nuk kanë vepruar njësoj.
Presidenti amerikan u ndal veçanërisht te Mbretëria e Bashkuar, duke deklaruar se Marina Mbretërore nuk ishte e gatshme për detyrën në këtë situatë.
Ndërkohë, sekretari amerikan i Shtetit, Marco Rubio, ka paralajmëruar gjithashtu se SHBA mund të rishikojë marrëdhëniet me NATO-n pas përfundimit të luftës me Iranin.
Në një intervistë për “Fox News”, Rubio tha se nëse aleanca shërben vetëm për mbrojtjen e Evropës, por nuk i përgjigjet nevojave të SHBA-së, atëherë kjo nuk është një marrëveshje e drejtë.
Trump vlerësoi deklaratat e Rubios, duke shtuar edhe më shumë peshë debatit për të ardhmen e marrëdhënieve mes SHBA-së dhe aleatëve të saj tradicionalë.