Donald Trump ka ndarë së fundmi një imazh të Nicolas Maduro, ku lideri venezuelian shfaqet i arrestuar dhe nën mbikëqyrje, duke nxitur reagime të forta ndërkombëtare.
Sipas mesazhit të publikuar nga Trump, Maduro ndodhet aktualisht në bordin e anijes luftarake amerikane USS Iwo Jima, çka sugjeron se autoritetet amerikane kanë marrë kontrollin ndaj tij.
Në imazh, Maduro shihet i veshur me një kostum sportiv gri të markës Nike, duke mbajtur në duar një shishe uji. Sytë i ka të mbuluar me një shirit të zi, ndërsa mbi veshë i duken kufje të mëdha.
Nuk është e qartë nëse pranë tij ndodhet edhe bashkëshortja, Cilia Flores, pasi ajo nuk shfaqet në fotografi. Megjithatë, më herët është bërë e ditur se Maduro është arrestuar së bashku me të në rezidencën qeveritare në kryeqytetin Karakas.
Gjatë ditës, Trump kishte deklaruar se Maduro është në rrugë për në New York, ku pritet të përballet me akuza të rënda që lidhen me narco-terrorizmin dhe përfshirjen në trafikun ndërkombëtar të drogës. Ky zhvillim, sipas Trump, është pjesë e përpjekjeve të Shtetet e Bashkuara të Amerikës për të ndëshkuar aktivitetet kriminale të udhëheqjes venezueliane.
Ngjarja pritet të ketë ndikim të thellë jo vetëm në politikën e brendshme të Venezuela, por edhe në marrëdhëniet ndërkombëtare dhe në strategjinë amerikane kundër trafikut të drogës dhe grupeve terroriste në rajon.