Kompania Rajonale e Ujësjellësit “Prishtina”, ka njoftuar se si pasojë e turbullirës së ujit në kanalin e Ibrit për shkak të vërshimeve, qytetet si Drenasi, Fushë-Kosova, Obiliqi dhe Prishtina do të kenë reduktime të ujit.
Në qytetin e Drenasit, Kompania e Ujësjellësit ka njoftuar se të dielën e 22 janarit furnizohet me ujë nga ora 06:00 deri në ora 11:00. Pas kësaj ore, do të ketë akumulin për ta rikthyer më pas furnizimin.
“Pikat e larta në Drenas që nuk janë furnizuar me ujë nga sistemi i furnizimit, kanë autobotin (auto cisternën) si alternativë për situatën që po kalojmë”, thuhet në njoftimin e KRU Prishtina.
Sa i përket pikës në Shkabaj është jashtë funksionit, si pasojë Fushë Kosova me zonë industriale, lagjia “Kalabria” dhe Obiliqi janë duke u furnizuar me alternativa të tjera.
Si shkas i kësaj, nga ora 10:00 deri në 16:00 në këto zona do të ketë reduktim, e nga 16:00 deri në 20:00 do të ketë furnizim me ujë.
“Përderisa, ITU Shkabaj është jashtë funksionit qytetet si: Fushë Kosova së bashku me Zonën Industriale, lagjja ‘Kalabria’, Obiliqi po furnizohen nga alternativa tjera, respektivisht nga Impiantet e tjera. Për këtë do të kenë reduktime të furnizimit me ujë në oraret e njëjta sikurse ditët e tjera, duke vazhduar edhe sot nga ora 10:00 dhe do të zgjasë deri në 16:00. Pastaj nga ora 16:00-20:00 kanë furnizim me ujë, për të vazhduar edhe ditën e nesërme me të njëjtin orar, vetëm se furnizimi për ditën e nesërme fillon në ora 05:00 në mëngjes. Për zonat e kryeqytetit, reduktime jemi shtrënguar të aplikojmë nga ora 23:00-5:00, përveç qendra e qytetit, QKUK, QKMF-të, Dardania”, theksohet në njoftimin e ujësjellësit “Prishtina”.
KRU Prishtina ka bërë të ditur se një situatë e tillë do të vazhdojë deri në përmirësimin e situatës me turbullirë në kanal, derisa ka theksuar se është e gatshme për të punuar me të gjitha potencialet teknike/operative.