Rusia dhe Ukraina të enjten e 3 nëntorit kanë këmbyer 214 të burgosur.
Ministria e Mbrojtjes së Rusisë ka bërë të ditur se Ukraina ka liruar 107 të burgosur dhe se ata do të transferoheshin në Moskë për “ndihmë mjekësore dhe psikologjike”, raporton Reuters.
Andriy Yermak, shefi i shtabit të presidentit ukrainas ka thënë se Rusia kishte liruar 107 luftëtarë ukrainas, duke përfshirë 74 që kishin mbrojtur punimet e çelikut Azovstal, në përpjekjen për të mbrojtur qytetin e Mariupolit, në muajin prill dhe maj.
Ndryshe më 29 tetor, Ukraina dhe Rusia kanë kryer një tjetër këmbim të të burgosurve.
Aksion ky i cili rezultoi në lirimin e 52 shtetasve ukrainas.
Në këtë këmbim ishin të përfshirë “oficerë, mjekë, rreshterë dhe ushtarë”.
Edhe më 11 tetor, Ukraina ka thënë se 32 ushtarë të saj janë liruar në kuadër të këmbimit të të burgosurve me Rusinë.
Ndryshe, të premten shënon dita e 254-të e agresionit rus në Ukrainë.
Si pasojë e kësaj lufte kanë humbur jetën mijëra persona dhe miliona të tjerë janë zhvendosur nga shtëpitë e tyre.