Një ditë zie po mbahet në Ukrainë pas një prej sulmeve më të rënda raketore ruse në muaj, ku u vranë të paktën 41 persona dhe u plagosën 166 të tjerë.
Spitali kryesor i fëmijëve në Kiev u godit, ku dy persona vdiqën dhe kërkimi për të mbijetuarit vazhdoi deri në mëngjes.
Rusia mohoi të ketë shënjestruar spitalin, duke fajësuar mbetjet e një rakete të mbrojtjes ajrore ukrainase, ndërsa Ukraina deklaroi se gjeti mbetje të një rakete ruse.
Presidenti ukrainas, Volodymyr Zelensky e quajti sulmin “brutal” dhe e përshkroi Vladimir Putinin si një “kriminel gjakatar”.
NATO do të mbajë një samit ku pushtimi i Ukrainës do të jetë në krye të axhendës.
Liderët botërorë e kanë dënuar sulmin, përfshirë kryeministrin britanik Sir Keir Starmer dhe presidentin amerikan Joe Biden, i cili premtoi mbështetje shtesë për mbrojtjen ajrore të Ukrainës.
Sulmi preku qytete të ndryshme si Kiev, Dnipro, Kryvyi Rih, Sloviansk dhe Kramatorsk, duke dëmtuar rreth 100 ndërtesa.
Në spitalin e fëmijëve në Kiev, fëmijët u evakuan, ndërsa shpëtuesit kërkonin të mbijetuar.
Kryetari i bashkisë së Kievit, Vitali Klitschko, ka deklaruar se 16 persona, përfshirë shtatë fëmijë, u plagosën në sulmin ndaj spitalit.
Tenistja ukrainase Elina Svitolina mbajti një fjongo të zezë në Wimbledon në shenjë respekti për viktimat.
Misioni i OKB-së raportoi se viktimat civile janë shtuar, me majin që ishte muaji më vdekjeprurës për civilët në gati një vit, ka raportuar BBC.
Në Rusi, guvernatori i rajonit të Rostovit raportoi për një zjarr në një termocentral pas sulmeve me dronë ukrainas.
Të paktën 20 të vrarë në Ukrainë, sulmohet edhe spitali i fëmijëve në Kiev