Në Dhomat e Specializuara të Kosovës në Hagë, këtë të martë, pritet të vazhdojë procesi gjyqësor në rastin e Hashim Thaçit dhe të tjerëve.
Ky proces gjyqësor pritet të fillojë nga ora 09:00 dhe të zgjasë deri në orën 16:30.
Ndryshe, në seancën e së hënës, ish-kryetari i Kuvendit të Kosovës, Kadri Veseli, në fjalën e tij në sallën gjyqësore i është drejtuar trupit gjykues për kohëzgjatjen e procesit gjyqësor dhe e dyta ka të bëjë personalisht me të si i akuzuar.
(VIDEO) Veseli flet në seancën gjyqësore: Dikush duhet të marrë përgjegjësinë për këtë proces
Ai ka thënë se dikush duhet të japë përgjegjësinë e vendimmarrjes që ky proces para popullit të Kosovës të jetë jo vetëm transparent, por edhe të ruajë dhe garantojë një gjykim të drejtë dhe në kohë të arsyeshme.
Mbrojtja e Veselit kritikon gjykatësit për ngadalësim të procesit ligjor
Gjithashtu, edhe mbrojtja e ish-kreut të UÇK-së, Veselit, gjatë ballafaqimit në seancë me trupin gjykues për faktin e vonesës së procesit gjyqësor special, ka thënë se njëra ndër shkaqet që ky proces gjyqësor po vijon me vonesa, është se gjyqtarët po nxjerrin pika të reja të cilat nuk janë përdorur as nga Prokuroria e Specializuar.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.