Lidhur me vdekjen e ish-pjesëtarit të sigurimit të ish-presidentit Hashim Thaçi, Xhavit Ferizi (Raketa), kanë reaguar nënkryetarja e PDK-së, Vlora Çitaku dhe deputeti i kësaj partie, Enver Hoxhaj.
Lexo më shumë: Vdes “Raketa”, ish-pjesëtar i sigurimit të ish-presidentit Hashim Thaçi
Çitaku, përmes një postimi, e ka cilësuar tashmë të ndjerin si njeri të madh, të guximshëm e të drejtë.
“Luftëtar. Legjendë”, ka shkruar Çitaku.
Tutje, ajo është shprehur se do ta kujtojë përjetë veprimtarin e Ushtrisë Çlirimtare të Kosovës.
Ndërsa Hoxhaj është shprehur se këtë lajm e kishte marrë me pikëllim, derisa e përshkruan si një mik të madh dhe të dashur nga të gjithë.
“Ngushëllime familjes, miqve dhe të gjithë atyre që e njohën. I pushoftë shpirti në paqe!”, ka shkruar ai.
Ish-komandati i UÇK-së në Zonën Operative të Drenicës, Sami Lushtaku, lidhur me vdekjen e “Raketës”, ka thënë se lajmi për ndarjen e tij nga jeta ishte i dhembshëm.
“Raketa ishte prej luftëtarëve të dalluar të Ushtrisë Çlirimtare të Kosovës, bashkëpunëtor i hershëm i Presidentit Hashim Thaçi, njeri me virtyte të larta njerëzore për të cilat do ta kujtojmë gjithmonë”, ka shkruar Lushtaku.
Ai u ka shprehur ngushëllime familjes Ferizi, miqve dhe dashamirëve. “Lavdi jetës dhe veprës së tij”, ka shkruar ai.