Një i paraburgosur që po mbahej në Burgun e Sigurisë së Lartë ka ndërruar jetë mbrëmë në Klinikën e Emergjencës të Qendrës Klinike Universitare të Kosovës (QKUK).
Sipas njoftimit të Shërbimit Korrektues të Kosovës dhe Departamentit Shëndetësor të Burgjeve, i paraburgosuri me inicialet K.K. ka vdekur rreth orës 23:20, njofton Dukagjini.
Tutje bëhet e ditur se K.K. gjatë ditës së djeshme kishte shfaqur disa çrregullime gastrointestinale dhe gjendje të theksuar molisjeje teksa tashmë viktima ishte trajtuar gjatë ditës nga personeli shëndetësor, por gjendja e tij nuk kishte shënuar përmirësim.
Për realizimin e një konsultimi specialistik, mjeku kujdestar kishte kërkuar që i paraburgosuri të dërgohej për trajtim dhe vlerësim të mëtejmë në QKUK.
“Fillimisht është dërguar në Qendrën Kryesore të Mjekësisë Familjare (QKMF) në Podujevë, ndërsa më pas, rreth orës 18:00, ai është transferuar në QKUK. Pas pranimit në QKUK, kanë filluar menjëherë procedurat diagnostikuese dhe trajtimi i tij nga stafi mjekësor. Megjithatë, pavarësisht përpjekjeve dhe trajtimit të ofruar, gjendja e tij shëndetësore nuk është përmirësuar dhe i njëjti ka ndërruar jetë”, thuhet në njoftim.
SHKK-ja, mes tjerash, bën të ditur se organet kompetente janë duke zhvilluar procedurat përkatëse ligjore, ndërsa shkaku i vdekjes pritet të përcaktohet dhe verifikohet përmes autopsisë.