Po vazhdon protesta e Veteranëve të Ushtrisë Çlirimtare të Kosovës(UÇK), të cilët i kanë thyer rrethojat dhe janë futur në oborrin e Kuvendit të Kosovës.
Ndërkaq, një numër i madh i pjesëtarëve të Njësisë Speciale të Policisë së Kosovës janë parë duke hyrë në oborrin e Kuvendit.
“Hajdeni brenda, hajdeni brenda”, janë dëgjuar duke thënë protestuesit, ndërsa Policia u është përgjigjur protestuesve, duke hedhur gaz lotsjellës.
Një protestues është dëgjuar duke thënë “Kemi ardhur në protesta, por protesta paqësore”, duke kërkuar që të mos hedhet gazi lotsjellës.
Policia ndërkaq, po qëndron para dyerve të Kuvendit, ku janë edhe protestuesit, të cilët e kanë bllokuar hyrjen.
Deputeti i PDK-së, Hisen Berisha, ka dalë para turmës së protestuesve, të cilët janë grumbulluar para Kuvendit të Kosovës.
Ai u ka bërë thirrje atyre që të mos e dëmtojnë pronën e Kuvendit si dhe të mos ushtrojnë dhunë te policët që po qëndrojnë aty.
“Ne nuk jemi pak jemi shumë, ne kemi bërë luftën, për ta sjellë lirinë për ta bërë këtë shtet. Ju keni të drejtë në çdo gjë, por një duhet ta dini, këta polic që janë detyru ta mbrojnë institucionin, ky vend, ky oborr, janë tonat. Këto janë si rezultat i gjakut tonë, ne duhet t’i mbrojmë jo t’i lëndojmë, mos gaboni ta dëmtoni asnjë pemë, e runa Zot ta prekni policin”, ka thënë ai.
Tutje Berisha, ka thënë se edhe deputetët e pozitës nuk do ta votojnë ndryshimin e projektligjit për pagën minimale, që do t’i përjashtonte veteranët nga rritja e pensioneve të tyre.
Ndryshe kjo protestë ka ndodhur pas një fjalimi të U.d. të kryetarit të OVL-UÇK-së, Faton Klinaku, i cili ka thënë se arsyeja e protestës është injorimi i Qeverisë së Kosovës, si dhe mospërfshirja e tyre në ligjin për pagën minimale.
“Sot dëshmojmë se tentimi i mohimit i kontributit të ushtarëve nga institucionet e Kosovës nuk do të ketë sukses, fatkeqësisht duhet të protestojmë në mbrojtje të vlerave të luftës, sot duhet të protestojmë për shkak se po u shkelen të drejtat tona dhe vlerat e luftës, neve na mohohet lufta që e bëmë, ne kishim takim me këtë pushtet dhe i kemi shprehur shqetësimet tona në ndryshimet që do t’i bëjnë pa neve, që jemi kategori ligjore, në momentet e fundit na është sakatosur ligji”, ka thënë Klinaku.
Protestuesit po mbajnë në duar flamuj kombëtarë dhe po brohorasin akronimin e Ushtrisë Çlirimtare të Kosovës dhe të ish-presidentit të Kosovës, Hashim Thaçi.
“Le ta di mirë Albin Kurti, që nuk mund të luajë me veteranët e luftës, sot i kemi veteranët duke u maltretuar në burgje të Hagës. Ne jua kemi pru lirinë”, dëgjohet të thotë njëri nga protestuesit.
Po ashtu, kësaj proteste i ka dhënë përkrahje edhe Aleanca për Ardhmërinë e Kosovës (AAK).
Ndërkaq, në të njëjtën ditë, të hënën mblidhet edhe Kuvendi i Kosovës, ku njëra nga pikat e rendit të ditës do të jetë votimi në parim i Projektligjit për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.
Ditë më parë, Klinaku e kishte paralajmëruar këtë protestë për të kundërshtuar, siç kishte thënë, tentimin e pushtetit për t’i larguar veteranët nga e drejta për t’u përfshirë në ndryshimet e pagës minimale.