Ministri i Shëndetësisë, Arben Vitia ka thënë se i njëjti është duke u përballur me presion të madh nga ana e Organit Shqyrtues të Prokurimit (OShP) dhe nga ana e Prokurorisë së Shtetit për nënshkrimin e tenderit me insulina, pa autorizim të marketingut.
Në një konferencë për media pas mbledhjes së Qeverisë së Kosovës, Vitia ka shprehur shqetësimin e tij lidhur me situatën e cila sipas tij, rrezikon shëndetin publik.
“Shprehim shqetësimin tonë në raport me një situatë e cila rrezikon në mënyrë shumë substanciale rrezikon shëndetin publik por rrezikon edhe ligjshmëritë e proceseve në MSH. E këtu kemi të bëjmë me tenderin për insulina, një tender që është hapur në dhjetorin e vitit 2020 në një fushatë pothuajse zgjedhore…Është betejë për ligjshmërinë, është një betejë për ruajtjen e shëndetit publik. MSH-ja shpreh edhe njëherë shqetësimin në lidhje me presionin e paligjshëm që po bëhet OSHP-së për furnizim me insulina. OSHP-ja dhe Prokuroria kanë ndërmarrë veprime të koordinuara për të bërë presion mbi Ministrinë e Shëndetësisë, që kontrata t’i nënshkruhet një operatori i cili nuk ka, madje as nuk ka aplikuar deri më tani, për autorizim-marketing, i cili është obligativ sipas Ligjit për pajisje dhe produkte medicinale dhe që është garancion i sigurisë”, ka thënë Vitia gjersa ka theksuar se përkundër presionit, nuk do të merren vendime të jashtëligjshme për të rrezikuar shëndetin publik.
Ky i fundit ka shprehur edhe dyshimet për motivin e këtij tenderi me ç’rast përmendi edhe mafian farmaceutike gjersa ka theksuar që gjendet para dy zgjedhjeve, me pasojë të njëjtë. Ai e theksoi se këtë nuk e konsideronte një betejë por diçka “të çuditshme”.
“Unë jam para dy zgjedhjeve…ta bëj nënshkrimin si ka kërkuar, ku pastaj unë vet edhe në aspektin moral edhe ligjor do të jem i përndjekur se kam shkelur ligjin. Nëse nuk e nënshkruaj do të ndiqem, nëse e nënshkruaj do të ndiqem”, ka shtuar ai gjersa ka theksuar se “nuk mund të nënshkruhet diçka që vë në pikëpyetje ligjshmërinë” e njëherit, “të dëmtojë shëndetin e qytetarëve”
Ministri Vitia ka deklaruar se OPSH-ja po kërkon nga MSH që kjo e fundit të bëjë shkelje gjersa ka i ka bërë thirrje që të qëndrojë brenda sferës së rolit të vet.