Kryetari i Aleancës për Ardhmërinë e Kosovës (AAK), Ramush Haradinaj, është takuar me drejtorin kryesor të Departamentit të Mbrojtjes për Evropë dhe politikat e NATO-s, Andrew L. Winternitz, të cilin e ka falënderuar për mbështetjen ndaj Kosovës dhe është shprehur se synimi i Kosovës është që sa më shpejt të jetë anëtare e NATO-s.
“Duke i falënderuar për mbështetjen e parezervë e cila rezultoi me formimin e Ushtrisë së Kosovës, potencova edhe një herë se synim i Kosovës është që sa më shpejt të jemi anëtar i NATO-s, në rresht me shtetet prijëse të lirisë dhe demokracisë në botë”, ka shkruar Haradinaj.
Ndër të tjera, i pari i AAK-së ka theksuar se i ka falënderuar për djemtë dhe vajzat amerikane që shërbejnë në Kosovë. Me theks të veçantë, Haradinaj ka kërkuar angazhim të vazhdueshëm të ShBA-së në forcimin dhe avancimin e FSK-së.
“Në takim shpreha falënderimet më të larta për djemtë dhe vajzat amerikane që shërbejnë në Kosovë. Kërkova nga z. Winternitz që angazhimi i Shteteve të Bashkuara të Amerikës në forcimin dhe avancimin e Forcës së Sigurisë së Kosovës të jetë i vazhdueshëm”, ka theksuar Haradinaj.
Ndërsa, është shprehur se vizita në Pentagon dhe takimi me Winternitz ka qenë një nder për të dhe i një rëndësie të veçantë.