Ministrja në detyrë e Drejtësisë, Albulena Haxhiu, ka reaguar për vrasjen e trefishtë në Gjilan, duke theksuar se dy nga të dyshuarit për këtë rast u është ndërprerë paraburgimi nga Gjykata Themelore në Prishtinë për veprat e fajdes dhe detyrimit.
Sipas ministres, ndërprerja e paraburgimit tregon një problem serioz në mënyrën se si trajtohen këto raste nga institucionet e drejtësisë.
“Bazuar në informacionet e siguruara nga Shërbimi Korrektues i Kosovës, dy nga të dyshuarit për vrasjen e trefishtë, kanë qëndruar vetëm pak muaj në paraburgim, nga data 21 qershor 2024 deri më 8 tetor 2024, me ndërprerje paraburgimi nga Gjykata Themelore në Prishtinë.
Kjo periudhë shumë e shkurtër paraburgimi për veprat që ata dyshohen të kenë kryer tregon një problem serioz në trajtimin e rasteve nga institucionet e drejtësisë. Një qëndrim kaq i shkurtër dhe ndërprerja e paraburgimit, mund të çojë në pasoja tragjike siç pamë sot me vrasjen e trefishtë”, ka shkruar Haxhiu në Facebook.
Ajo ka shtuar se sistemi i drejtësisë duhet të marrë përgjegjësi maksimale për të garantuar mbrojtjen e jetës dhe sigurinë e qytetarëve.