I është caktuar 30 ditë paraburgim nga Gjykata e Pejës të dyshuarit për vrasjen që ndodhi të premten në Zllakuqan të Klinës.
Lajmin e ka bërë të ditur Zëdhënësja e Gjykatës së Pejës, Tringa Zhuti.
Në lidhje me rastin të premtën, ishin arrestuar tre persona, i dyshuari kryesor dhe dy të tjerë që dyshohet se ishin të involvuar në rast.
Të shtunën me urdhër të gjyqtarit janë bastisur dhe kontrolluar katër lokacione, specifikisht shtëpi.
Në tri nga to nuk është gjetur asgjë e jashtëligjshme, ndërsa në shtëpinë e të dyshuarit, A.N. lindur më 1967, janë gjetur dhe sekuestruar, tetë armë të llojeve të ndryshme, karikatorë dhe municion.
Ndërkaq, ende nuk janë dhënë detaje më të hollësishme lidhur me rastin në fjalë.
Sipas njoftimit të policisë, më datë 15 prill 2022, rreth orës 16:40, Policia ishte informuar për një rast, rrahje i cili kishte ndodhur në fshatin Pataqan të Klinës.
Përderisa, policia po kërkonte të dyshuarit, është njoftuar se një person gjendet në QKMF në Klinë, i cili ishte i plagosur me armë zjarri, e që nga aty me autoambulancë është dërguar në spitalin rajonal në Pejë, ku ishte konstatuar vdekja e viktimës nga mjeku kujdestar.