Analisti Visar Ymeri, në “Debat Plus” në RTV Dukagjini, ka thënë se duhet të kërkohet nga pjesa perëndimore masa ndaj Serbisë tash.
“Duhet të kërkohet nga pjesa perëndimore masa ndaj Serbisë tash. Sepse nëse Kosova është nën masa e unë gjithmonë i kam mbrojtur këto masa sepse vazhdoj edhe sot të them se Qeveria e Kosovës jo gjithëherë ka qenë në vijë me bashkësinë ndërkombëtare për atë se çfarë do të bëj në veri”, ka thënë Ymeri.
Sipas Ymerit, Serbia po e shkakton një rrezik të përgjithshëm të përmasave shumë të mëdha.
“Qartazi e kemi tashmë Serbinë e cila jo vetëm se po e rrit tensionin, por po e shkakton një rrezik të përgjithshëm të përmasave shumë të mëdha, përtej Kosovës”, ka thënë ai.
Ditën e djeshme në Banjskë të Komunës së Zveçanit, u sulmua Policia e Kosovës, ku si pasojë mbeti i vrarë rreshteri policor Afrim Bunjaku nga Samadrexha e Vushtrrisë, një zyrtar policor i plagosur dhe dy të tjerë të lënduar.