Kryetari i Nismës në Prizren, Zafir Berisha, ka mohuar se ka kërcënuar përmes telefonit kryetarin e kësaj komune, Shaqir Totaj.
Përmes një përgjigjeje me shkrim, Berisha ka thënë se lajmet që kanë qarkulluar rreth tij dhe Totajt nuk qëndrojnë, transmeton Telegrafi.
Ndër të tjera, ai ka thënë se aktualisht ndodhet në Himarë, dhe se të hënën kur të kthehet do të shikojë se çfarë po ndodh.
“Jam në Himarë, se kam shumë idenë se çka po ndodh me shokun Shaq. Të hënën kthehem dhe duhet të sqarohem, kush ishte skenaristi i këtij episodi të filmit “Zafa”. Nuk qëndrojnë këto lajme që kishin qarkulluar rreth meje dhe Shaqës, edhe pse e di se ka shumë të interesuar që të ndodhë ai film”, ka thënë Berisha.
Mëngjesin e së dielës, zëdhënësi i policisë së Prizrenit, Vesel Gashi deklaroi për Portali D se rasti ishte raportuar në stacionin policor të shtunën e 25 qershorit dhe se i dyshuari ishte intervistuar, e më pas ishte liruar në procedurë të rregullt.
Pas kërcënimeve të njëpasnjëshme nga Zafir Berisha, Shaqir Totaj e paraqet rastin në polici