Këshilli Prokurorial i Kosovës, (KPK), e ka caktuar ushtrues detyre në pozitën e Kryeprokurorit të Shtetit, prokurorin Besim Kelmendi.
Detyrën ai do ta ushtrojë deri në një vendim të ri të KPK-së.
Sot (të enjten), i ka përfunduar mandati 7-vjeçar, kryeprokurorit, Aleksandër Lumezi. Më 6 prill të këtij viti KPK, kishte votuar Blerim Isufaj për Kryeprokuror të ri të Shtetit, ai ishte vlerësuar me 98 pikë, duke u bërë kandidati më i votuar për këtë pozitë.
Isufaj, nga KPK-ja, është propozuar për dekretim te presidentja e Republikës së Kosovës, Vjosa Osmani.
Presidentja, sipas ligjit, e bën emërtimin, por mund edhe të mos e bëjë. Lëvizja Vetëvendosje kërkon që procesi të përsëritet nga pika zero.
Në lidhje me zgjedhjen e Isufajt, kishte reaguar Bashkimi Evropian si dhe organizatat joqeveritare vendore, të cilat kishin shprehur dyshimet e tyre për mënyrën e përzgjedhjes së tij.
Presidentja Vjosa Osmani, së fundi kishte organizuar një takim me OJQ-të, për të diskutuar në lidhje me përzgjedhjen e kryeprokurorit të ri.