Zyrtarë të lartë të Pentagonit kanë mbërritur në Ukrainë për të “diskutuar përpjekjet për përfundimin e luftës” me Rusinë, ka njoftuar ushtria amerikane.
Ekipi, i udhëhequr nga Sekretari i Ushtrisë Amerikane, Dan Driscoll, pritet të takohet të enjten me Presidentin ukrainas, Volodymyr Zelensky, i cili do të kthehet nga një vizitë në Turqi.
Dita e mërkurë ka sjellë edhe një sulm rus me raketa dhe dronë në qytetin perëndimor të Ternopilit, ku u vranë të paktën 25 persona, përfshirë fëmijë. Rusia ka nisur pushtimin e plotë të Ukrainës në shkurt 2022.
Në Kiev, Driscoll udhëhiqet nga Shefi i Shtabit të Ushtrisë amerikane, gjeneral Randy George, komandanti kryesor i ushtrisë amerikane në Evropë, gjeneral Chris Donahue, dhe Sergeanti Major i Ushtrisë, Michael Weimer.
“Sekretari Driscoll dhe ekipi mbërritën këtë mëngjes në Kiev në emër të administratës, në një mision informues për të takuar zyrtarë ukrainas dhe për të diskutuar përpjekjet për përfundimin e luftës,” tha në një deklaratë zëdhënësi i Ushtrisë, kolonel David Butler.
Më vonë, Driscoll zhvilloi bisedime me Ministrin e Mbrojtjes të Ukrainës, Denys Shmyhal.
Driscoll dhe gjeneral George janë zyrtarët më të lartë ushtarakë amerikanë që zhvillojnë bisedime në kryeqytetin ukrainas që nga marrja e detyrës nga Presidenti Donald Trump në janar.
Autoritetet ukrainase nuk kanë komentuar publikisht temat e diskutimit me amerikanët, por një zyrtar ukrainas i tha CBS se fokusi do të jetë situata ushtarake në terren dhe planet për një mundësi armëpushimi.
Raportime të ndryshme sugjerojnë se SHBA-ja dhe Rusia kanë hartuar plan-propozime të reja për përfundimin e luftës, duke përfshirë tërheqje territoriale dhe ulje të ndjeshme të forcave ukrainase. Ky plan 28-pikësh besohet të jetë punuar nga i dërguari special i Trump, Steve Witkoff, dhe i dërguari i Vladimir Putin, Kirill Dmitriev.
Zëdhënësi i Kremlinit, Dmitry Peskov, duket se e minimizoi lajmin, duke thënë se nuk ka “ndryshime të reja” nga ajo që quhet “shpirti i Anchorage”, duke iu referuar samitit të gushtit mes Putin dhe Trump në Alaskë.
Çfarëdo marrëveshjeje që të arrihet gjatë këtij takimi një-ditor nuk është bërë publike. Presidenti Zelensky ka përjashtuar vazhdimisht mundësinë e dhënies së territoreve në dorë të Rusisë.
Ndërkohë, Ukraina dhe aleatët perëndimorë, përfshirë SHBA-në, kërkojnë armëpushim të menjëhershëm përgjatë të gjithë vijës frontale, ndërsa Moska kërkon kushte që Ukraina i konsideron si kapitullim të de-fakto.
Ministri i Jashtëm rus, Sergei Lavrov, ka deklaruar se kushtet e Moskës për një marrëveshje paqeje, duke përfshirë dorëzimin e territoreve dhe kufizimin e ushtrisë ukrainase, nuk kanë ndryshuar që nga shpallja e tyre nga Putin dy muaj para pushtimit të plotë./BBC