Gjashtë persona, përfshirë një fëmijë gjashtëvjeçar, kanë ndërruar jetë pas goditjes së një rakete ruse në qytetin verior të Ukrainës, Chernihiv, bëri të ditur Ministria e Brendshme e Ukrainës.
Siç raporton BBC, kjo e fundit ka treguar se 11 fëmijë ishin në mesin e 37 personave të plagosur.
Viktimat ishin rrugës për në kishë për të festuar një festë fetare kur raketa goditi. Një shesh kryesor, një ndërtesë universiteti dhe një teatër thuhet se janë dëmtuar nga sulmi.
Presidenti Volodymyr Zelensky postoi një video të shkurtër që tregon makina të dëmtuara dhe shesh të mbushur me mbeturina. Një trup gjithashtu mund të shihej shkurtimisht.
Chernihiv është afër kufirit me Bjellorusinë.
Ajo u pushtua nga Rusia në fillim të pushtimit, por më pas u rimor nga trupat ukrainase.
“Një raketë ruse goditi mu në qendër të qytetit, në Chernihiv tonë. Një shesh, universiteti politeknik, një teatër,” postoi presidenti Zelensky në Telegram.”Një e shtunë e zakonshme, të cilën Rusia e ktheu në një ditë dhimbjeje dhe humbjeje. Ka të vdekur, ka të plagosur”.
Forcat ajrore të Kievit thanë se ushtria ukrainase kishte rrëzuar 15 nga 17 dronët Shahed të prodhuar nga Irani të nisur nga Moska në një sulm gjatë natës.