Shefi i grupit paralmentar të PDK-së, Abelard Tahiri ka reaguar për miratimin në lexim të parë të Projtekligjit për Institutin e Krimeve të Kryera gjatë luftës në Kosovë.
“Çfarë “krimesh të luftës” po synon të hetojë Albin Kurti pas përfundimit të luftës në qershor të 1999?! Si mund të kryhen “krime të luftës” pasi që lufta të ketë marrë fund?”, ka shkruar Tahiri.
Shefi i grupit parlamentar të PDK-së ka thënë se “Serbia ka kryer krime lufte e gjenocid në Kosovë deri në qershor të vitit 1999. Hulumtimi i krimeve të luftës duhet të vazhdojë e të institucionalizohet”.
“Por përpjekja e Qeverisë së Albin Kurtit, për ta bërë një ligj që synon të hetojë e hulumtojë “krimet” që ndërlidhen me luftën deri me datën 31 dhjetor, 2000, është përpjekje që i shkon përshtat pikërisht atyre që janë përgjegjës për gjenocidin në Kosovë”, shtoi Tahiri.
Sipas Tahirit, 31 dhjetori i 2000-tës, është epitomë e Serbisë që përpiqet t’ia ndërrojë kahjen historisë dhe të gjejë amnisti për gjenocidin e kryer.
Abelard Tahiri ka shtuar se do të kundërshtojnë me çdo mjet politik tjetërsimin e historisë përmes ligjeve të dëmshme.
Gjatë seancës së plenare të së premtes së shtatë tetorit, Kuvendi i Kosovës ka miratuar në lexim të parë Projektligjin për Institutin e Krimeve të Kryera gjatë luftës në Kosovë.
Projektligji për Institutin e Krimeve të Kryera gjatë luftës është miratuar me 58 vota për, ka marrë mbështetjen në lexim të parë.
Ndërsa, katër deputetë kanë votuar kundër miratimit të këtij Projektligji, ka njoftuar nënkryetarja e Kuvendit të Kosovës, Saranda Bogujevci.