Ministrja e Arsimit, Arbërie Nagavci, e ka ripërsëritur edhe njëherë qëndrimin e MAShT-it, se e shtunja duhet të jetë ditë pune për mësimdhënësit, për t’i kompensuar orët e humbura.
“Nesër mësimdhënësit e kane obligim ligjor të dalin në punë ndryshe do t’i ndalet avanci, nuk po e them në formë kërcënimi, por mësimdhënësit e kanë obligim ligjor të dalin në punë sipas Kalendarit të Ministrisë se Arsimit”, ka thënë Nagavci.
Kundër këtij vendimi të MAShTI-t, ka dalë Sindikata e Bashkuar e Arsimit, përfaqësuesit e të cilës, kanë thënë se Nagavci nuk e ka respektuar kontratën kolektive, e cila thotë se, orët e humbura si pasojë e grevës nuk kompensohen.
Po ashtu, kundër mësimit në ditët e vikendit ka dalë edhe Këshilli i Prindërve, të cilët kategorikisht kanë thënë se refuzojnë t’i dërgojnë fëmijët e tyre në shkolla edhe nëse kjo bëhet obligative.
Vendimin për kompensim të orëve gjatë vikendit, e ka marrë Ministria e Arsimit, për shkak të orëve të humbura si pasojë e grevës së përgjithshme në arsim për një muaj.
Në kundërpërgjigje të grevës, Ministria e Financave kishte vendosur fillimisht të mos ua procesojë pagat mësimdhënësve që nuk kishin punuar. Por megjithatë, u mor vendim që pagën mujore mësimdhënësit ta merrnin në formë të avansit, me kusht që t’i kompensonin orët e humbura.