Ushtria ukrainase ka vazhduar ta mbrojë qytetin e Mariupolit, përkundër ultimatumit që kishte marrë nga Rusia. Kjo është bërë e ditur nga zyrtarë të Mariupolit, të dielën për CNN.
Një këshilltar i kryetarit të Mariupolit ka reaguar ndaj kërkesave të Ministrisë së Mbrojtjes së Rusisë që ushtarët ukrainas, që ende po rezistojnë në këtë qytet të dorëzohen.
Petro Andriushchenko ka thënë se pavarësisht invazionit rus dhe ultimatumit, forcat ukrainase do të vazhdojnë të luftojnë.
“Të shtunën pasdite, okupatori njoftoi se do të ofrojë “një korridor dorëzimi” për trupat ukrainase që kanë mbetur. Por, mbrojtësit tanë do të vazhdojnë mbrojtjen”, ka shkruar Andriushchenko në Telegram.
Ai thotë se rezistenca e forcave ukrainase në Mariupol vazhdon përtej fabrikës së çelikut Azovstal, ku është duke rezistuar një batalion i forcave ukrainase.
“Ndonëse okupuesi dëshiron të paraqesë se rezistenca është limituar në vetëm fabrikën e çelikut Azovstal, realiteti nuk është i tillë”, ka thënë Andriushchenko.
Refuzimi nuk i ka pëlqyer forcave ruse, ndaj edhe kanë paralajmëruar “eliminim” të rezistencës.
Ministria pohoi gjithashtu se sipas ushtarëve ukrainas që ishin dorëzuar më parë “ka deri në 400 mercenarë të huaj që iu bashkuan forcave ukrainase” të bllokuar në fabrikën e çelikut, duke përfshirë, evropianë dhe kanadezë.
“Në rast të rezistencës së mëtejshme, të gjithë ata do të eliminohen,” tha ai.
Qyteti i Mariupolit ka qenë nën rrethim për më shumë se një muaj, me viktima të rënda dhe një pjesë e madhe e qytetit nga është shkatërruar nga granatimet.