Gjashtë persona kanë humbur jetën pasi dy avionë historikë ushtarakë janë përplasur gjatë një shfaqjeje ajrore në qytetin amerikan Dallas, të shtunën e 12 nëntorit.
Avionët, një bombardues B-17 Flying Fortress dhe një gjuajtës P-63 Kingcobra, janë përplasur me njëri-tjetrin rreth orës 13:20 me orën lokale.
Ata ishin pjesë e shfaqjes Përkujtimore të Forcave Ajrore “Wings Over Dallas” që po mbahej rreth 10 milje nga qendra e qytetit.
Gjyqtari i Qarkut të Dallas, Clay Jenkins, ka thënë “sipas ekspertit tonë mjekësor të qarkut Dallas, ka gjithsej gjashtë viktima nga incidenti i djeshëm i shfaqjes ajrore “Wings Over Dallas”.
Zyrtarët nuk kanë konfirmuar se sa njerëz ishin në bord gjithsej, por B-17 zakonisht mban një ekuipazh prej katër ose pesë personash, ndërsa Kingcobra ka një pilot të vetëm.
B-17 është përdorur në bombardimet e ditës mbi Gjermaninë gjatë Luftës së Dytë Botërore, ndërsa Kingcobra është përdorur kryesisht nga forcat sovjetike gjatë të njëjtit konflikt, raporton Sky News.
Përplasja do të hetohet nga Bordi Kombëtar i Sigurisë së Transportit, me një ekip që pritet të mbërrijë vonë, të dielën e 13 nëntorit.