Shefja e grupit parlamentar të Lëvizjes Vetëvendosje, Mimoza Kusari-Lila, ka deklaruar se “Plani franko-gjerman” është i ndarë në dy faza, derisa ka shtuar se faza e parë nuk e ka brenda njohjen reciproke.
Faza e dytë sipas saj e synon normalizimin e plotë në mes të dy vendeve, por ajo nuk e ka përmendur nëse kjo fazë do të prodhojë njohje.
“Plani përmban zgjidhjen përfundimtare të ndarë në dy faza. Faza e parë nuk e përmban njohjen reciproke. Faza e dytë synon normalizimin e plotë. Në këtë propozim Kosova nuk ka qëndruar indiferente, keni dëgjuar se Bislimi e Kurti kanë thënë se është serioz por refuzojnë të japin elemente të cilat tash veç i kanë përcjellë”, ka thënë ajo.
Ajo ka folur edhe për bojkotin e Listës Serbe, duke thënë se ka mbi katër muaj që ata nuk janë duke marrë pjesë në seancat plenare.
“Ka mbi 4 muaj e gjysmë që Lista Serbe nuk merr pjesë në seancat. Arsyeja nuk është parimore, por ka të bëjë me ruajtjen e Milan Radojiçiqit. Pakënaqësia e tyre është shfaqur në atë moment kur atij i është dhënë lajmi se Policia po e kërkon. Jo për ndonjë shkelje të të drejtave të dikujt”, është shprehur Kusari-Lila.