Zëvendësministri i Arsimit, Dukagjini Pupovci, ka dhënë dorëheqje. Portali Dukagjini përmes burimeve, e ka konfirmuar dorëheqjen e tij.
Ndërkaq, arsyet e dorëheqjes ende nuk janë bërë të ditura, por mësohet se ai do ta ushtrojë detyrën e tij deri në fundin e muajit dhjetor të këtij viti.
Siaps burimeve dorëheqja e Pupovci-t ishte paralajmëruar prej kohësh. Dukagjin Pupovci është ekspert i arsimit derisa në pozitën e zëvendësministrit ishte emëruar në Qeverinë Kurti2.
Po ashtu, sipas burimeve brenda qeverise është konfirmuar dorheqja e Pupovcit por edhe ata nuk kanë dhënë detaje për arsyet e tij.
Pupovci është profesor universitar dhe ekspert i arsimit tashmë e disa vite. Ai shkollën fillore dhe atë të mesme i mbaroi në Prishtinë.
Studimet e matematikës i përfundoi në Fakultetin e Shkencave Matematiko-Natyrore (FSHMN) të Universitetit të Prishtinës, kurse studimet pasuniversitare të magjistraturës në fushën e matematikës aplikative i përfundoi në Universitetin e Zagrebit, duke mbrojtur temën e magjistraturës me titull “Konvergjenca e metodave paralele për reduktimin e normës”.
Disertacionin e doktoratës me titull “Paralelizimi i disa metodave të tipit të Jakobit për zgjidhjen e problemit të vlerave vetjake” e mbrojti në FSHMN të Universitetit të Prishtinës.
Pupovci ka kontribuuar në zhvillimin e dokumenteve të rëndësishme të politikave dhe është bashkautor i studimeve e artikujve në fushën e arsimit dhe kërkimit shkencor në Kosovë. Nga marsi i vitit 2000 ka qenë drejtor ekzekutiv i Qendrës për Arsim të Kosovës (KEC), organizatë joqeveritare e specializuar në fushën e arsimit.