Federata e Futbollit e Kosovës ka njoftuar se të shtunën e tre dhjetorit ka vdekur në fushë futbollisti 17-vjeçar.
FFK ka shtuar se futbollisti 17-vjeçar ishte futbollist i FC Trepça ’89, Erion Kajtazi pas një sulmi kardiak dhe njëherësh anëtari i ekipeve kombëtare të Kosovës, Erion Kajtazi.
“Federata e Futbollit e Kosovës me pikëllim të madh e njofton opinionin se sot pas një sulmi kardiak ka ndërruar jetë futbollisti i FC Trepça ’89 dhe njëherësh anëtari i ekipeve kombëtare të Kosovës, Erion Kajtazi”, njofton FFK-ja.
Tutje thuhet se futbollisti Kajtazi ka qenë duke luajtur në ndeshjen A&N – Trepça’89, në kuadër të Superligës në kategorinë e juniorëve, kur në një moment ka rënë pa vetëdije në fushë.
“Stafet mjekësore të të dyja klubeve kanë intervenuar me shpejtësi për t’i ofruar ndihmë dhe më pas me urgjencë e kanë dërguar në Spitalin Rajonal në Prizren. Megjithatë, përkundër përpjekjeve maksimale të mjekëve, Erioni nuk ka dhënë shenja jete dhe është konstatuar vdekja e tij nga ataku kardiak”, thuhet tutje në njoftim.
Për vdekjen e futbollistit 17-vjeçar ka reaguar dhe kryetari i Federatës së Futbollit të Kosovës, Agim Ademi.
Ademi është shprehur “i tronditur” nga ndarja e parakohshme nga jeta e futbollistit të FC Trepça’89 dhe anëtarit të ekipeve të grupmoshave të Kombëtares së Kosovës, Erion Kajtazi.
“Një lajm që na tronditi dhe preku zemrat e gjithsecilit prej nesh si komunitet i futbollit, por edhe opinionin e Kosovës në përgjithësi. Vdekja e parakohshme i ndali në gjysmë ëndrrat e tij rinore dhe futbollistike”, ka shkruar Agim Ademi.
“Erioni ndërroi jetë në fushën e gjelbër, aty ku filloi ta jetësonte ëndrrën e tij për t’u bërë një futbollist i madh, me të cilin do të krenohej jo vetëm familja, por edhe i gjithë kombi”.
Ademi ka theksuar se “Erioni ishte talent i jashtëzakonshëm, por sot u shua për të udhëtuar drejt parajsës, e për jetuar përgjithmonë i freskët në kujtimet e familjes, bashkëlojtarëve dhe tërë komunitetit të futbollit”.
Kryetari i FFK-së ka përcjellur ngushëllimet “më të thella për këtë humbje të madhe” familjes Kajtazi, FC “Trepça’89” dhe bashkëlojtarëve e miqve të Erionit.