Mohsen Shekari u var të enjten në mëngjes, pasi u shpall fajtor nga një Gjykatë Revolucionare për “armiqësi kundër Zotit”, njoftuan mediat shtetërore.
Ai u akuzua si një “rebelë”, i cili bllokoi një rrugë kryesore në Teheran më 25 shtator dhe plagosi me thikë një pjesëtar të Forcës paraushtarake Basij.
Një aktivist tha se ai u dënua pas një “gjyqi të dukshëm, pa ndonjë proces të rregullt”.
Mahmood Amiry-Moghaddam, drejtor i të Drejtave të Njeriut të Iranit me bazë në Norvegji, postoi në Twitter se ekzekutimet e protestuesve do të fillonin të ndodhin çdo ditë nëse autoritetet iraniane nuk përballen me “pasoja të shpejta praktike ndërkombëtarisht”.
Gjyqësori i Iranit ka njoftuar deri më tani se 11 persona janë dënuar me vdekje, në lidhje me protestat, të cilat filluan në mesin e shtatorit pas vdekjes në paraburgim të Mahsa Amini, një gruaje 22-vjeçare, e cila u arrestua nga policia e moralit, për dyshimet se e kishte veshur hixhabin apo mbulesën e saj “në mënyrë të pahijshme”.
Protestat e udhëhequra nga gratë janë përhapur në 160 qytete dhe 31 provincat e vendit, dhe janë parë si një nga sfidat më serioze për Republikën Islamike që nga revolucioni i vitit 1979.
Udhëheqësit e Iranit i kanë portretizuar ato si “trazira” të nxitura nga armiqtë e jashtëm të vendit dhe kanë urdhëruar forcat e sigurisë që “të merren me vendosmëri” me ta.
Deri më tani, të paktën 475 protestues janë vrarë dhe rreth 18 mijë e gjysmë janë arrestuar, sipas Agjencisë së Lajmeve të Aktivistëve për të Drejtat e Njeriut (HRANA).