Zëvëndëskryeministri i Kosovës, Besnik Bislimi ka thënë se gjatë qëndrimit tre ditor këtë javë në Bruksel, ka pasur mundësinë të mbaj një takim me mërgatën shqiptare dhe me anëtarë të qendrës së Lëvizjes Vetëvendosje në Belgjikë.
“Folëm gjatë për situatën në vend, politikat tona qeverisëse, reformat e ndërmarra dhe progresin e Kosovës në sundim të ligjit, luftën kundër korrupsionit e krimit të organizuar, zhvillim ekonomik, politika sociale e kohezion shoqëror”, ka shkruar Bislimi.
Tutje Bislimi ka potencuar se kanë bashkëbiseduar mbi aplikimin për anëtarësim, “që ishte dhe arsyeja e vizitës së zhvilluar, në kuadër të informimit dhe koordinimit me institucionet e BE-së”.
“Kosova është në një trajektore të re të zhvillimit dhe përfaqëson vlera demokratike e evropiane”, ka theksuar Bislimi.
Zëvëndëskryeministri i Kosovës ka potencuar se bashkatdhetarët që punojnë dhe jetojnë jashtë vendit japin një kontribut të rëndësishëm dhe janë një nga shtyllat e zhvillimit ekonomik.