Përplasjet shpërthyen të hënën, gjatë një proteste të opozitës në Mal të Zi, duke reflektuar një krizë të thellë politike midis kampeve properëndimore dhe proserbe e proruse në vendin e vogël ballkanik, i cili është anëtar i NATO-s.
Policia malazeze përdori sprej ndaj qindra protestuesve që hodhën gurë, shishe dhe objekte të tjera, gjatë një demonstrate jashtë parlamentit, thuhet në një deklaratë të policisë. Askush nuk u lëndua rëndë, tha policia, shkruan AP.
Protesta u mbajt, ndërsa ligjvënësit brenda ndërtesës së parlamentit votuan për t’i hequr presidentit properëndimor të vendit një rol vendimtar në emërimin e kryeministrit. Ligji u shty përpara nga shumica proserbe dhe proruse në parlament, duke zemëruar opozitën properëndimore.
Ligji i diskutueshëm u miratua të hënën, nga 41 ligjvënës në parlamentin prej 80 anëtarësh.
Ambasada amerikane në Podgoricë bëri thirrje për qetësi.“Shtetet e Bashkuara kërkojnë një kthim të menjëhershëm në një diskurs të qetë dhe konstruktiv”, tha ambasada në Twitter, duke shtuar “Ne u bëjmë thirrje të gjithë liderëve dhe qytetarëve malazezë që të vazhdojnë të bisedojnë dhe të gjejnë zgjidhje paqësore për problemet politike”.
Mali i Zi, një aleat kryesor perëndimor në Ballkan, është paralizuar nga një krizë qeveritare disamujore që ka bllokuar procesin e integrimit të vendit në Bashkimin Evropian. Qeveria e Malit të Zi ra nga një votë mosbesimi në gusht, kurse një ngërç politik ka vazhduar që atëherë.