Kryetar i Odës Ekonomike të Kosovës, Lulzim Rafuna ka thënë se Qeveria e Republikës së Kosovës duhet të ndërmarrë zhvillimin e një dialogu urgjent me komunitetin e biznesit dhe kjo si shkak i hyrjes së investimeve në Kosovë.
Gjersa ka treguar rezultatet e bazuara nga Banka Qendrore e Kosovës, i ftuar në studion e “Debat Plus” të RTV Dukagjini, Lulzim Rafuna ka thënë se ndonëse shifrat e investimeve janë rritur, shumica e tyre ka kaluar në paluajtushmëri.
“Nëse i shohim tarifat e BQK-së, sa i përket investimeve, si shifra ka rritje. Por, në strukturë të investimeve, shumica ka shkuar në paluajtushmëri. Prej 556 milionëve sa kanë qenë në fillim të vitit, 394 milionë kanë shkuar në patundshmëri. Në aktivitete financiare dhe sigurimeve 69 milionë, në xehtari dhe gurore 41 milionë, në ndërtimtari 20 milion ndërsa në prodhimtari, 4 milionë e gjysëm. Kjo tregon se ku kanë hyrë investimet e huaja sipas raportit të BQK-së dhe kjo është shumë shqetësuese. Kështu që, Qeveria duhet të zhvillojë një dialog urgjent me komunitetin e biznesit”, ka deklaruar ai.
Krahas kësaj, ai ka theksuar se një mangësi qëndron tek ideja e subvencionimit.
“Fatkeqësia është këtu se, ne nuk e subvencionojmë. Ne nuk i subvencionojmë vendet e punës për investimet qoftë të huajat qoftë vendore, se ne po i ndajmë gjithmonë investimet e huaja por i kemi edhe ato të brendshmet … ne nuk i subvencionojmë, ne nuk iu ofrojmë tokë, ne nuk ju ofrojmë lehtësira të tjera brenda një zone ekonomike”, ka deklaruar ai.
Sipas të parit të OEK-së, në mënyrë urgjente, duhet të punohet një strategji në thithjen e investimeve të huaja.