Deputeti nga radhët e Lidhjes Demokratike të Kosovës (LDK), Avdullah Hoti ka thënëse tashmë, strategjia energjetike i është kthyer projekteve nga “regjimet e kaluara” dhe se asgjë e re nuk përfshihet në “Strategjinë energjetike 2022-2031”.
Përmes një postimi në Facebook, Hoti ka thënë se objektivat në këtë strategji nuk tregojnë objektiva për strategji shtetërore.
“Asgjë e re në “Strategjinë energjetike 2022-2031”. I humbën dy vite me anulimin e projektit të gazit me amerikanë. Tani u kthehen projekteve të nisura nga “regjimet e kaluara”, përfshirë: (1) termocentralin me gaz, (2) Bursën Energjetike me Shqipërinë, apo (3) integrimin e rrjetit energjetik me rajonin. Objektivat në këtë strategji janë shkruar sikur për fletushka promovuese për kursim të energjisë, e jo objektiva për strategji shtetërore ku tregohet: sa do rriten kapacitet, sa do të kushtojnë investimet dhe si do të mbulohen ato investime.”, ka shkruar Hoti në Facebook.
Pas mbledhjes së Qeverisë të mbajtur të premten ishte deklaruar Ministrja e Ekonomisë, Artane Rizvanolli.
Ministrja Rizvanolli ka thënë se aktualisht kjo strategji nuk parasheh ndërtimin e hidrocentraleve të reja, por nëse ka mundësi që të ndërtohen kapacitete ujore, atëherë do të shqyrtohet kurdo që është në përputhje me objektivat e ambientit.
Ndërkaq, Kurti ka thënë se pikë e rëndësishme e kësaj mbledhjeje, është shqyrtimi i Draftit të Strategjisë të Energjisë së Republikës së Kosovës 2022-2031.
“Sot para nesh kemi dokumentet më të rëndësishme për këtë vit, strategjinë e vitit 2022-2031 për energji, thelbësor për zhvillimin energjetik të Kosovës, kjo strategji parasheh zhvillime të shpejta dhe avancime në sektorin e energjisë, mundëson një sektor energjetik të qëndrueshëm”.
Sipas tij, shqyrtimi i kësaj strategjie, është i një rëndësie të veçantë, pasi për herë të parë qytetarët i vendos në qendër që të kenë energji të përballueshme.
Ndryshe, të premten, Qeveria e Kosovës ka miratuar draftin e Strategjisë për energjinë 2022-2031.
Rizvanolli: Strategjia e energjisë nuk parasheh ndërtimin e hidrocentraleve të reja