Kryeministri i Kosovës, Albin Kurti, e ka komentuar mënyrën e festimit të Granit Xhakës, pas fitores 3:2 ndaj Serbisë, në kuadër të Kupës së Botës, e cila u mbajt në Katar.
Pas përfundimit të ndeshjes, Xhaka kishte festuar me fanellën e bashkëlojtarit të tij te Zvicra, Ardon Jashari.
Kjo mënyrë e festimit ishte ndërlidhur me komandantin e Ushtrisë Çlirimtare të Kosovës, Adem Jashari.
Në intervistën e dhënë për gazetën zvicerane “Blick”, Kurti ka thënë se deklaratat kundër racizimit janë të drejta, dhe se nëse nderohet komandanti Adem Jashari, është mirë edhe për të.
“… Mendoj se deklaratat kundër racizmit janë të drejta dhe të rëndësishme. Dhe nëse dikush e nderon identitetin e Adem Jasharit, kjo, po ashtu, është mirë për mua”, ka thënë ai.
I pyetur se a ka ndonjë mesazh për Granit Xhakën, Xherdan Shaqirin dhe të tjerët, Kurti u ka shprehur falënderime për frymëzimin e talentëve të rinj.
“Faleminderit që frymëzove kaq shumë talente të rinj për të luajtur futboll. Edhe në Kosovë”, ka thënë Kurti.