Instituti Demokratik i Kosovës (KDI), në një konferencë për media, ka publikuar rezultatet e Indeksit të Perceptimit të Korrupsionit për vitin 2022.
Eugen Cakolli, hulumtuesi i lartë në KDI, ka thënë se Kosova është renditur e 84-ta në botë, sa i përket vlerësimit për luftim të korrupsionit.
“Për vitin 2022, rezultatet e Indeksit tregojnë që disa shtete të botës kanë pasur fare pak apo nuk kanë pasur progres në luftimin e korrupsionit, duke bërë që 2/3 e shteteve të botës të jenë në anëtare të pranueshme prej 50 pikësh ku bën pjesë edhe Kosova. Për vitin 2022, Kosova është e vlerësuar me gjithsej me 41 pikë, duke u renditur në vendin e 84 nga 180 shtete të botës”, ka thënë Cakolli.
“Ky rezultat reflekton një trend të vazhdueshëm dhe inkurajues të njehsimit të Kosovës në këtë indeks, krahasuar me vitet e kaluara”, ka shtuar ai.
Hulumtuesi i lartë i KDI-së ka theksuar se në raport me vendet e tjera të Ballkanit, Kosova renditet e dyta pas Malit të Zi, ndërsa lë pas vetes Maqedoninë e Veriut me 40 pikë, Shqipërinë dhe Serbinë me nga 36 pikë, si dhe Bosnje Hercegovinën me 34 pikë. EO