Presidenti i Serbisë, Aleksandër Vuçiq, tashmë e ka pranuar propozimin evropian për zgjidhjen e mosmarrëveshjeve në mes të Kosovës dhe Serbisë.
Sonja Biserko, kryetare e Komitetit të Helsinkit për të Drejtat e Njeriut dhe Milivoj Beslin, historian – janë nënshkrues të Apelit për pranimin e propozimit evropian për zgjidhjen e çështjes së Kosovës, i cili do të prezantohet të enjten para opinionit, shkruan Danas.
“Me nënshkrimin e propozimit evropiano-amerikan për Kosovën, fillon procesi që i hap perspektivën evropiane Serbisë dhe Kosovës”, ka thënë Sonja Biserko.
Ajo thotë se duhet të merren parasysh rrethanat në të cilat është ofruar ky propozim.
“Ndryshimet gjeostrategjike kanë vazhduar për një kohë të gjatë, por ato u bënë të dukshme me agresionin rus kundër Ukrainës. Falë Ukrainës, Kosova aktualizohet si një çështje e papërfunduar në oborrin e Evropës. Kjo më në fund, shpresoj, do ta konsolidojë gradualisht Ballkanin dhe Serbia më në fund do t’i njohë kufijtë e saj”, shtoi Biserko.
Biserko ka potencuar se të enjten presidenti Vuçiq do të deklarohet në kuvendin e Serbisë, lidhur me këtë propozim, që sipas saj “tashmë ai e ka pranuar”.
“Nuk pres ndonjë surprizë të madhe gjatë debatit në Kuvendin e Serbisë lidhur me propozimin që presidenti tashmë e ka pranuar. Ai tashmë e “përpunoi” anëtarësimin e tij kur kërcënoi se do të jepte dorëheqjen, që do të ishte fundi i SNS”.
Ajo beson se një pjesë e opozitës do të votojë kundër, me protesta të ashpra dhe duke akuzuar Vuçiqin për tradhti.