Dhjetë persona kanë vdekur si pasojë e disa ortekëve në malet austriake dhe ato zvicerane përgjatë fundjavës.
Turistë nga Zelanda e Re, Kina dhe Gjermania, kanë qenë në mesin e të vdekurve në disa qendra skijimi, shkruan BBC.
Autoritetet austriake kanë aktivizuar nivelin e katërt të ortekëve – i dyti për nga rreziku – pas reshjeve intensive dhe erës në disa zona.
Niveli i katërt i alarmit në Austri nënkupton se “mund të krijohen ortekë shumë të mëdhenj”.
Policia austriake njoftoi për pesë vdekje të dielën, duke përfshirë atë të një 59-vjeçari që po përdorte borëpastrues në rajonin perëndimor të Tirolit.
Ata gjetën gjithashtu trupat e një udhërrëfyesi skijimi në Sant Anton am Arlberg dhe një 62-vjeçari i cili po bënte ski në rrugë rreth majës së Hohe Aifner.
Të shtunën, një 17-vjeçar nga Zelanda e Re, një shtetas kinez 32-vjeçar dhe një gjerman rreth të 50-ave për të cilët thuhej se të gjithë po bënin ski jashtë shtigjeve të përcaktuara të skive kur ranë ortekët – u gjetën të vdekur.
Në Zvicër, një grua 56-vjeçare dhe një burrë 52-vjeçar mbeten të vdekur gjithashtu nga bora e paqëndrueshme në kantonin juglindor të Graubuenden të shtunën në mëngjes.
Policia zvicerane ka deklaruar se një anëtar i tretë i grupit të tyre arriti të shpëtonte i padëmtuar.
Ortekët janë të zakonshëm në të dy vendet. Sipas agjencisë së lajmeve APA të Austrisë, vetëm të shtunën u raportuan 30 ortekë në rajonin e Tirolit – 11 prej tyre përfshinin njerëz.
Skijatorët pa përvojë këshillohen që të qëndrojnë në ambiente të hapura, ndërsa skijatorët me përvojë të qëndrojnë larg terreneve shumë të pjerrëta.
Pavarësisht paralajmërimeve, qendrat e skijimit në perëndim të Austrisë janë të mbushura, për shkak të pushimeve dimërore në shkollat e Vjenës.