Kryetari i Partisë Demokratike të Kosovës (PDK), Memli Krasniqi, bashkë me familjen e tij, ka nisur të hënën javën e aktiviteteve për shënimin e 15-vjetorit të pavarësisë së Kosovës.
Kreu i PDK-së bashkë me bashkëshorten e tij, Melizën, dhe fëmijët, Borën, Malin dhe Verën, ka bërë homazhe te varri i qëndrestarit të papërsëritshëm, Adem Demaçi – duke e nisur kështu Javën e Pavarësisë, përplot me aktivitete, vizita dhe mirënjohje.
Përmes një postimi në Facebook, Krasniqi është shprehur se Adem Demaçi është simboli i sakrificës, guximit dhe atdhedashurisë – karakteristika të cilat mishërojnë përpjekjet e shumë brezave në rrugën e lavdishme të lirisë.
“E kujtoj si sot, Adem Demaçi ishte një ndër personat e vetëm të cilin ish-Kryeministri Hashim Thaçi e kishte ftuar në ndërtesën e Qeverisë në mbrëmjen e 16 shkurtit të vitit 2008, për të ndarë me të të gjitha përgatitjet finale për Ditën e shpalljes së Pavarësisë – përfshirë edhe prezantimin e flamurit të Kosovës. Ishte një ndër momentet më emocionuese që kisha përjetuar deri atëherë”, ka shkruar Krasniqi.
Ai ka kërkuar ngritjen e një shtatoreje meritore në Prishtinë të Adem Demaçit, teksa ka njoftuar se PDK do ta marrë këtë nismë në Kuvendin Komunal të Prishtinës.
Sipas tij, Adem Demaçi nuk është thjesht një emër, por një institucion.
“Baca Adem nuk është thjesht një emër, por është institucion. Prandaj, kujtesa, respekti dhe mirënjohja historike ndaj personalitetit të tij duhet të tregohet edhe përmes ngritjes së një shtatoreje meritore në Prishtinë”.