Kreu i Partisë Demokratike të Kosovës, Memli Krasniqi në rastin e 53-vjetorit të themelimit të Universitetit të Prishtinës “Hasan Prishtina”, ka thënë se ishte institucioni që e formësoi identitetin kombëtar dhe shtroi rrugën akademike në Kosovë.
Megjithatë, sipas Krasniqit studentët nuk po e shohin të ardhmen në Kosovë. Ai ka renditur shkaqet për të cilat ndodh një gjë e tillë.
“Fatkeqësisht, sot, shumë studentë të jashtëzakonshëm nuk po e shohin të ardhmen në Kosovë. Shkaqet tashmë janë të mirënjohura: mundësitë e kufizuara të punësimit, humbja e shpresës dhe mungesa e vizionit qeverisës”, ka shkruar Krasniqi në llogarinë e tij në Facebook.
Tutje, ai ka shtuar se prioritet në ditët e sotme duhet të jetë rikthimi i besimit te të rinjtë, gjë që sipas tij është obligim dhe përgjegjësi e secilit.
“Prandaj, nëse ekziston sot një prioritet për të cilin duhet të përkushtohemi të gjithë – padyshim është rikthimi i besimit tek të rinjtë për të ndërtuar një të ardhme të sigurtë dhe të mirëfilltë në vendin tonë. Në këtë drejtim, është obligim dhe përgjegjësi e secilit prej nesh që të veprojmë dhe të angazhohemi”, ka vijuar Krasniqi.
Krasniqi ka shprehur mirënjohje për profesorët, asistentët, studentët dhe gjithë stafin e UP-së.
“UP-ja, që nga themelimi, u kthye në kështjellë të dijes e rezistencës, nga ku, historikisht, studentë e profesorë së bashku, artikuluan aspiratat tona kombëtare dhe projektuan rrugën e lirisë. Kur jemi vetëm dy ditë larg nga festimi i 15 vjetorit të Pavarësisë së Kosovës, shprehim mirënjohjen e madhe për të gjitha gjeneratat e profesorëve, asistentëve, studentëve dhe stafit tjetër përbërës të UP-së, për kontributin e çmueshëm drejt përmbushjes së këtij ideali”.
Ndërsa, thirrjet e tij tutje i ka pasur për ndërtimin e një shteti që rinia është çelës.
“Ndërtimi i një shteti i cili krijon më shumë mundësi për përmbushjen e potencialit rinor – është i vetmi çelës për të mbajtur rininë tonë të mrekullueshme në vend – e për të cilën kemi aq shumë nevojë. Rinia ka qenë forca shtytëse në rrugën e lirisë dhe pavarësisë. Rinia duhet të jetë edhe energjia e cila ndërton dhe zhvillon vendin tonë.Së bashku mund t’ia dalim – besoni në Kosovë”, ka përfunduar Krasniqi.