Të premten shënohet 15-vjetori i Pavarësisë së Kosovës, në nder të se cilës janë parashikuar disa vizita, organizime e nderime.
Agjenda shtetërore do të nisë nga ora 08:00 ku do të mbahet mbledhje festive e Qeverisë së Kosovës, duke pasuar më pas në 08:20 që do të ngrihet flamuri i Republikës së Kosovës.
Në ora 08:30 do të bëhen nderime te Monumenti i të Pagjeturve, në vazhdimësi në 08:45 do të bëhen homazhe te varri i ish-presidentit Ibrahim Rugova, duke u pasuar në orën 08:50 me homazhe te varri i veprimtarit Adem Demaçi.
Ndërkaq nga ora 09:50 do të bëhen homazhe në Kompleksin Memorial “Adem Jashari” në Prekaz. E në orën 10:30 në Kuvendin e Kosovës do të interpretojë Filarmonia e Kosovës.
Sa i përket seancës solemne të Kuvendit të Republikës së Kosovës, ajo pritet të fillojë nga ora 11:00.
Më pas agjenda shtetërore vijon me nderime te monumenti i policëve të rënë në detyrë që nis nga ora 11:20, në 11:30 bëhen nderime te monumenti “Heroinat”.
Në mesditë, nga ora 12:00 do të parakalojnë trupat e FSK-së dhe policisë së Kosovës. Më pas në ora 16:15 do të bëhet ndezja e 1133 qirinjve para Teatrit Kombëtar në kujtim të fëmijëve të vrarë gjatë luftës.
Presidentja e Republikës së Kosovës, Vjosa Osmani, në orën 17:00 do të bëjë pritjen shtetërore.
Ndërsa, mbrëmja festën e Pavarësisë e gjen me koncert nga Radio Televizioni i Kosovës në sallën “ 1 Tetori”, që fillon nga ora 20:15.