Deputeti i Lidhjes Demokratike të Kosovës (LDK), Avdullah Hoti, përmes një reagimi në Facebook është shprehur se ligjet mund të dërgohen në Gjykatë Kushtetuese, në rastet kur dyshohet për cenim të rendit kushtetues.
“Ai që ka frikë ose që kundërshton dërgimin e ligjeve në Kushtetuese ka qëllime politike” ka thënë ai.
Ndërsa, ka theksuar se në raste të tilla interesi personal është i pranishëm.
“Ligjet dërgohen në Kushtetuese kur ka dyshime se mund të cenohet rendi kushtetues. Ai që ka frikë dhe që shpreh kundërshtim ndaj dërgimit të ligjeve në Kushtetuese ka qëllime politike jo fisnike, të cilat nuk janë në interes të qytetarëve por të tij personalisht”, ka shkruar Hoti në llogarinë e tij në Facebook.
Një reagim i tillë erdhi pasi Kurti në mbledhjen e Qeverisë së Kosovës të mërkurën ka thënë se nuk mbahet në mend kur janë dërguar më tepër ligje në Kushtetuese se tash, që sipas tij është “synim për të penguar reformën”.