Korporata Energjetike e Kosovës ka dalë me një sqarim lidhur me subvencionet që ka marrë nga Qeveria e Kosovës.
KEK-u këtë e ka bërë nëpërmjet një njoftimi në Facebook, ku thekson se nga subvencioni i përgjithshëm nga Qeveria në vlerë prej 30 milionë eurosh, KEK-u në prill të vitit 2023 ka njoftuar Ministrinë e Ekonomisë për pjesën e mbetur (të pashpenzuara) prej 7.01 milionë eurosh të kësaj korporate.
“Këto mjete mbahen në llogari të ndarë nga afarizmi i KEK-ut, dhe shfrytëzohen vetëm për importin e energjisë elektrike sipas vendimit të Qeverisë se Republikës së Kosovës për subvencionimin e importit të energjisë elektrike”, ka njoftuar KEK-u.
Ndërsa, Dukagjini ditë më parë ka siguruar draft-raportin e Komisionit Hetimor Parlamentar lidhur me menaxhimin e krizës energjetike nga Qeveria e Republikës së Kosovës.
Në këtë draft-raport, njëra nga çështjet është se si Korporata Energjetike e Kosovës (KEK) i ka menaxhuar 30 milionë euro subvencione nga Qeveria, duke theksuar se KEK-u nuk ka ofruar informata për menaxhimin e fondeve të ndara nga subvencioni i energjisë në vlerë prej 7 milionë eurosh.
“Nga fondi i ndarë prej 10 milionë eurosh, në dispozicion kanë mbetur 7 milionë euro, për të cilat, ne nuk kemi të dhëna shtesë për shpenzimin e tyre… KEK SHA nuk ka ofruar informata për menaxhimin e fondeve të ndara nga subvencionimi i energjisë për vlerën 7 milionë euro”.
Kështu thuhet në draft-raportin e Komisionit, lidhur me menaxhimin e krizës energjetike nga Qeveria e Republikës së Kosovës.
Ndërkaq, KEK-u, gjithashtu ka kritikuar raportimet që janë bërë bazuar në këtë draft-raport të Komisionit, duke i cilësuar si “dezinformata”.
“Prandaj, qarkullimi dhe shpërndarja dezinformatave për mos transparencë të menaxhimit të subvencioneve për importin e energjisë elektrike është i plotësisht i pa bazë dhe me tendencë të dezinformimit të opinionit publik”.