Ministri i Punëve të Brendshme, Xhelal Sveçla ka përkujtuar rënien heroike të familjes Jashari në 25-vjetorin e Epopesë.
“Në mëngjesin e 5 marsit të vitit 1998 familja e lavdishme Jashari në Prekaz u rrethua nga forca të shumta ushtarake të ushtrisë serbe. Kjo nuk ishte hera e parë e rrethimit të tyre. Angazhimi i tyre ishte fakt i papranueshëm për agresorin serb. Por kjo ishte hera e fundit, sepse këtu nisi kthesa historike e luftës sonë që Serbia gjenocidale nuk e pati menduar. Nisi lufta e madhe për çlirim”, ka shkruar Sveçla.
Sveçla ka thënë se “Serbia me mjetet e saj të rënda të luftës shkoi kundër synimit të vet. Madhështia e saj përmes armëve u sfidua nga madhështia e rezistencës së familjes Jashari. E këtu zuri vend frymëzimi e vullneti i mbarë popullit tonë për një luftë të re”.
Ministri Sveçla ka shtuar se familja Jashari ka trasuar rrugën të cilën, sipas tij “nuk mund dhe nuk duhet të devijojmë”, duke theksuar se rezistenca dhe sakrifica e tyre për liri janë “udhërrëfyesi më i qartë për ne në punën për Republikën”.