RTV Dukagjini mëson se synimi i delegacionit kosovar mbrëmjen e së premtes ka qenë që çështja e të zhdukurve gjatë luftës në Kosovë të hyjë si një paragraf i veçantë në kuadër të planit evropian.
Gazetari i RTV Dukagjinit, Mehmet Krasniqi po raporton drejtpërdrejt nga vendtakimi në Ohër. Ai sjell detaje nga zhvillimet e mbrëmjes të së premtes.
“Një nga ekipet e RTV Dukagjini po qëndron në Suharekë pasi atje është duke u zhvilluar një takim që lidhet me personat e zhdukur gjatë luftës dhe ka qenë pikërisht kjo temë e cila ka mbajtur zgjuar deri vonë anëtarët e delegacionit të Kosovës mbrëmë. Siç kemi mësuar nga burimet tona të RTV Dukagjini, bëhet fjalë që në aneksin e planit evropian të përfshihet edhe një paragraf që trajton personat e zhdukur gjatë luftës, për vendndodhjen e tyre vazhdimisht Serbia ka refuzuar të jap informacione”, ka deklaruar gazetari Mehmet Krasniqi.
Në Ohër gjendet edhe Kryetari i Komisionit për Personat e Zhdukur, Andin Hoti.
Gazetari Krasniqi ka bërë të ditur se Kurti nuk ka pranuar të deklarohet për media pas përfundimit të takimit me homologun e tij maqedonas.
Takimet e ndara pritet të nisin nga ora 10:30. I pari që pritet të takojë Borrell dhe Lajçak do të jetë presidenti serb, Aleksandër Vuçiq dhe pas tij, Kurti.
Ndryshe, më herët të shtunën, Kryeministri i Republikës së Kosovës, Albin Kurti ka zhvilluar takime me udhëheqësin e partisë Bashkimi Demokratik për Integrim në Republikën e Maqedonisë së Veriut, Ali Ahmeti dhe ministrin e Jashtëm të Maqedonisë së Veriut, Bujar Osmani.
Takimi i shumëpërfolur i nivelit të lartë në mes të kryeministrit të Republikës së Kosovës dhe presidentit të Serbisë, Aleksandër Vuçiq do të zhvillohet sot, e shtunë, në Ohër të Maqedonisë.
Që të dy protagonistët tashmë kanë konfirmuar pjesëmarrjen e tyre në këtë takim.
Pjesë e takimit do të jetë edhe i dërguari i posaçëm i Uashingtonit për Ballkanin Perëndimor, Gabriel Escobar, i cili do të marrë pjesë në cilësinë e vëzhguesit.